Programmata
Programmata scribo maxime lingua Python, necnon XML/TEI et LaTeX. Fontes programmatum meorum in GitHub et in Codeberg reperiuntur.
-
py-words: lexicon Latinum cum morphologia
2026 · v3.20 · in Codeberg et GitHub
py-words lexicon est Latino-Anglicum et Latino-Hispanicum, in utramque partem, lingua Python scriptum. Ex programmate WORDS Guillelmi Whitaker ortum est, sed et codex et data de novo ordinata sunt, et nunc lexicon Anglicum Lewis et Short continet et Hispanica Echave-Sustaeta et De Miguel. Voces Latinas declinatas vel coniugatas, et integros versus, in formas suas et lemmata resolvit, cum significationibus Anglice vel Hispanice redditis, et voces Latinas pro Anglicis aut Hispanicis invenit. In fenestra, in linea mandatorum, in terminali vel in navigatro operatur, et nichil aliud quam Python 3.13 aut recentiorem requirit.
-
krunner-py-words: py-words in KRunner
2026 · v1.1.1 · in Codeberg et GitHub
krunner-py-words py-words in KRunner, in KDE Plasma 6, transfert: scribe
pwet vocem Latinam, aut integrum versum Latinum, et articuli eius dum scribis apparent, quisque cum forma lexici, significatione et formis resolutis (amīc-ōrum GEN.PL). Perpw ~ein partem contrariam procedit, a voce Anglica vel Hispanica ad Latinam. Clavis Enter inquisitionem in fenestra py-words aperit; alie actiones inventa articuli exscribunt aut inquisitionem in lexico in rete aperiunt. Inventa optiones py-words sequuntur, et parva fenestra propria prefixum, linguam significationum et interfaciei, numerumque inventorum statuit. Programma, lexico onerato, in memoria manet, ita ut quelibet inquisitio celeris sit. Lingua Python cum nexibus D-Bus scriptum est, et vel ut fasciculus Fedore in Copr, qui py-words secum affert, vel ex fontibus cum Python 3.14 aut recentiore instituitur. -
py-wtk: Victionarium ex terminali vel ex mensa
2026 · v1.13 · in Codeberg et GitHub
py-wtk interfacies est lingua Python scripta ad voces in Victionario Anglico inquirendas sine navigatro. Tribus modis prebetur, ut instrumentum linee mandatorum, ut interfacies terminalis totum quadrum occupans et ut fenestra mense, que omnia eundem codicem habent. Articulum integrum ostendit, non tantum definitiones: etymologiam, pronuntiationem, exempla et citationes, notas de usu, tabulas flexionum, synonyma, vocabula derivata et cognata, descendentia et translationes, omnium linguarum pagine vel earum tantum quas elegeris (solius Latine, verbi gratia, vel Latine et Hispanice). Titulos quoque paginarum inquirit et JSON ordinatum aliis programmatibus reddit. Nichil aliud quam Python 3.15 aut recentiorem cum bibliotheca eius ordinaria requirit (et Tkinter pro fenestra), et prebetur etiam AppImage per se constans pro Linux.
-
krunner-py-wtk: Victionarium in KRunner
2026 · v1.0.1 · in Codeberg et GitHub
krunner-py-wtk py-wtk in KRunner, in KDE Plasma 6, transfert: scribe
wtket vocem, et articuli eius ex Victionario apparent, singuli pro singulis partibus orationis in singulis linguis, cum linea lemmatis et primis definitionibus. Lingue in ipsa inquisitione eliguntur (wtk rosa @lapro sola Latina), locutiones plurium vocum admittuntur, et vox sine pagina titulos similes suggerit. Clavis Enter articulum in fenestra py-wtk aperit; alie actiones articulum integrum exscribunt aut in Victionario aperiunt. Inquisitiones expectant donec scribere cesses et in filo separato currunt, ita ut KRunner numquam hereat; inventa recentia in memoria servantur. Parva fenestra optionum prefixum, linguas et numerum inventorum ac definitionum statuit. Lingua Python scriptum est, et Python 3.14 aut recentiorem, py-wtk et nexus D-Bus pro Python requirit. -
krunner-abbr: abbreviationes in KDE Plasma explicare
2026 · v2.0.1 · in Codeberg et GitHub
krunner-abbr additamentum est KRunner pro Plasma 6, lingua Python scriptum, quod abbreviationes explicat: scribe
abbret abbreviationem, preme Enter, et verba plene scripta in memoriam transcriptoriam exscribuntur. Abbreviationes in documento TOML servantur et loca vacua admittunt pro diebus, pro memoria transcriptoria, pro textu scripto, pro fenestris interrogationis et pro mandatis terminalis, cum colis inter se concatenandis ad textum purgandum (litteras initiales more titulorum maiusculas faciendas, lineas textus ex PDF exscripti coniungendas, signa citationis mutanda, lineas ordinandas). Exempla affert pro LaTeX et Markdown, pro lingua Latina (numeros Romanos, apices) et pro BibTeX ex DOI petendo, necnon fenestram optionum cum prospectu vivo. Python 3.14 aut recentiorem requirit. -
QuickView: documenta in KDE Plasma celeriter inspicere
2026 · v0.2.5 · in GitHub
QuickView furca est retractata programmatis QuickView Mustaphe Alioglou, instrumenti ad documenta celeriter inspicienda in KDE Plasma 6, more Quick Look in macOS: elige documentum in Dolphin, preme clavem spatii, et tabula fluitans cum prospectu apparet; sagitte per directorium discurrunt vel per documenta simul electa transeunt. Imagines ostendit, PDF (cum inquisitione et indice laterali), libros EPUB in paginas compositos, Markdown redditum, codicem fontium cum syntaxi coloribus distincta, HTML, sonos et pelliculas, contenta archivorum compressorum, tabulas calculatorias in suis cancellis, et documenta officii per LibreOffice in paginas composita. Demon semper presens efficit ut tabula intra viginti fere millesimas secundi appareat, et quilibet analysator in carcere bubblewrap currit, sine accessu ad rete vel ad systema documentorum. Furca subsidium pro LibreOffice ex Flathub addit, vitium corrigit quo tabula herere poterat, demonem in modulos minores dividit et institutorem tutiorem reddit. Lingua Python cum PySide6 scriptum est, et Python 3.15 aut recentiorem et bubblewrap requirit.
-
py-imposition: impositio PDF ex linea mandatorum
2026 · v0.9 · in Codeberg et GitHub
py-imposition documenta PDF ad impressionem et ligaturam ex linea mandatorum parat. Libellos facit (glutine compactos, filo per dorsum consutos, vel sectos et cumulatos, cum ratione progressus foliorum et ligatura a dextra ad sinistram), folia plures paginas in singulis faciebus continentia et dispositiones repetitas; paginas quoque transponere, resecare, movere et in maius minusve redigere potest, margines excedentes, notas sectionis et plicature, numeros paginarum et sigilla addere, data variabilia inserere, et documenta dividere vel coniungere. Mandata concatenari, ut series iterum adhibende servari, vel directoriis vigilatis adiungi possunt, que omnia PDF in ea delata tractant. Lingua Python cum pikepdf et ReportLab scriptum est, et Python 3.15 aut recentiorem requirit.
-
pdf-word-finder: in quibus paginis PDF vox inveniatur
2026 · v1.4 · in Codeberg et GitHub
pdf-word-finder in documento PDF indicem vocum, locutionum vel expressionum regularium inquirit, et paginas in quibus singule apparent refert, singulis terminis singulas lineas tribuens, ad modum indicis libri. Numeros paginarum in libro impressos reddit (numeros Romanos in partibus preliminaribus, numerationes in sequentibus voluminibus de novo incipientes), non locum pagine in documento, et cum PDF titulis paginarum caret, monet potius quam eos fingat. In linea mandatorum vel in fenestra operatur, et nichil aliud quam Python 3.9 aut recentiorem et
pypdfrequirit; PyMuPDF, si adest, adhibet ut paginas cum columnis, notis inferioribus vel apparatu critico rectiore ordine legat. -
py-foliation: titulos paginarum documentorum PDF mutare
2026 · v0.8 · in Codeberg et GitHub
py-foliation titulos paginarum documentorum PDF mutat, id est numerationem quam inspector PDF paginis attribuit. Liber cuius partes preliminares numeris i, ii, iii signantur et cuius textus rursus ab 1 incipit, hos numeros in inspectore ostendere potest, loco simplicis numerationis 1, 2, 3 paginarum documenti; tituli tantum mutantur, pagine vero intacte manent. Tituli per intervalla statuuntur, quorum quodque primam paginam suam habet, stilum (numeros Arabicos, Romanos vel litteras, maiusculas vel minusculas, vel nullum numerum), numerum a quo incipit et prefixum, ita ut appendix per App-1, App-2 currere possit, vel ultima pagina Tegumentum vocari. Fenestram habet ad titulos paginatim videndos et mutandos, cum facultate revocandi et iterandi, et lineam mandatorum ad idem in scriptis faciendum; fenestra mandatum exscribere potest quod eosdem titulos alii documento tribuit. Interfacies Anglice et Hispanice loquitur. Lingua Python cum pikepdf et PySide6 scriptum est, et vel ut AppImage pro Linux, vel ut fasciculus Fedore in Copr, vel ex fontibus cum Python 3.15 aut recentiore instituitur.
-
py-redact: documenta PDF expungere
2026 · v0.4.5 · in Codeberg et GitHub
py-redact documenta PDF expungit. In paginis notas quid delendum sit, et in exemplari expuncto quidquid sub singulis notis iacet in perpetuum tollitur: textus, littera post litteram, pars imaginum quam nota tegit, delineationes quas operit, et annotationes campique formularum quos tangit. Hoc non idem est ac rectangulum nigrum pingere, quod textum ab oculis abscondit sed in documento relinquit; py-redact eum eximit, et post servationem exemplar examinat, ut certum sit nichil eorum que sub nota erant adhuc legi posse. Locus colore impleri vel ut est relinqui potest, cum textu superscripto, ut
REDACTED, vel cum nota exceptionis FOIA. Pluribus modis notatur: super textum trahendo vel quadrum pingendo, omnia loca inveniendo et notando ubi vox, index vocum vel formula occurrit (numeri telephonici, inscriptiones epistolarum electronicarum, numeri chartarum et identitatis, dies, rationes argentarie), et notam in aliis paginis repetendo. Potest etiam occulta documenti tollere (metadata, adiuncta, signacula, commentaria, textum occultum, scripta) et exemplar ut PDF/A vel PDF/X per py-pdfconform servare. Fenestra Anglice et Hispanice loquitur. Lingua Python cum PyMuPDF et PySide6 scriptum est, et vel ut AppImage pro Linux, vel ut fasciculus Fedore in Copr, vel ex fontibus cum Python 3.14 aut recentiore instituitur. -
py-pdfconform: documenta PDF in PDF/A et PDF/X-4 convertere
2026 · v1.2.1 · in Codeberg et GitHub
py-pdfconform documenta PDF ad duas normas ISO convertit: PDF/A, ad diuturnam conservationem (PDF/A-1b, 2b et 3b), et PDF/X-4, ad impressionem. Unicum est scriptum linee mandatorum. Ghostscript ipsam conversionem facit; pikepdf ante eam documenta cifris clausa vel corrupta aperit, et post eam metadata amissa restituit et corrigit que Ghostscript perperam relinquit. Deinde quodque effectum probatur: documenta PDF/A per veraPDF, si institutum est, documenta PDF/X-4 per examen structure proprium. Monet de omnibus que norma eum abicere cogit (JavaScript, adiuncta, annotationes in PDF/X, transparentias in imagines conversas in PDF/A-1b), documentum originale numquam superscribit, et codices exitus scriptis aptos reddit. Python 3.14 aut recentiorem, Ghostscript 10 aut recentiorem et pikepdf requirit.
-
py-xmlvalidate: TEI-XML secundum Schematron ex terminali probare
2026 · v1.14 · in Codeberg et GitHub
py-xmlvalidate scriptum est lingua Python, quod documenta TEI-XML secundum regulas Schematron in ODD inclusas probat (vel in documento
.schiam extracto, vel ex schemate RelaxNG ab ODD genito collectas, que sunt regule quas Jing negligit), easque per Saxon exsequitur. Non sicut oXygen, quod post centum errores tacite cessat, omnia peccata refert, cum numero pro singulis regulis et, si petitur, numero linee etxml:iduniuscuiusque elementi peccantis, et dicit quot omiserit cum index certo numero terminatur. Si qua peccata sunt, codicem exitus a 0 diversum reddit, ita ut in Makefile vel in hamo pre-commit adhiberi possit. Python 3.15 aut recentiorem,saxoncheetlxmlrequirit.Schema etiam per se invenit ex declarationibus
<?xml-model?>documenti, et relatio eius in forma JSON extensionem Schematron Validator pro VS Code, infra descriptam, alit. -
Schematron Validator: TEI-XML in VS Code dum scribis probare
2026 · v0.5.10 · in Visual Studio Marketplace · fontes in Codeberg et GitHub
Schematron Validator extensio est pro VS Code que py-xmlvalidate in editorem transfert. Documenta XML et TEI secundum regulas Schematron (ex
.sch, ex ODD, vel ex schemate RelaxNG regulis instructo) probat dum scribis, cum aperiuntur et cum servantur, mutationibus nondum servatis comprehensis. Quodque peccatum in elemento peccante sublineatur et in tabula problematum recensetur, cum gravitate ex attributoroleregule sumpta. Si schema RelaxNG est et jing institutum, errores structure etiam adduntur, et XML male formatum ibi signatur ubi signum fractum apertum est. Schema ex declaratione<?xml-model?>documenti sumitur vel in optionibus statuitur; index in linea status ostendit utrum documentum mundum sit, et mandata te sinunt interpretem Python eligere aut schema, quod in fonte suo mutatum est, iterum depromere. Scriptum una cum extensione prebetur; extensio Python 3.15 aut recentiorem cumsaxoncheetlxmlrequirit, et pagina eius docet quomodo ea instituantur.
Alia programmata
-
2026
nivaca-leuven, thema colorum pro Emacs, ex Leuven Fabricii Niessen sumptum, sed paulo obscurius. Nexus
-
2026
nv-theme-color-adjustments, fasciculus Emacs qui thema presens, dum programma currit, clarius vel obscurius reddit, nec documentum thematis nec optiones Custom tangens. Nexus
-
2025
Leuven Beamer theme, thema pro LaTeX Beamer, libere ad imitationem Leuven, thematis Emacs Fabricii Niessen, factum. Nexus
-
2025
Oxygen XML colour themes, themata colorum pro Oxygen XML Editor, inter que sunt versiones thematum Modus, Ef, Doric et Dracula. Nexus
-
2021
witrels, programma quod relationes inter testes in documentis TEI-XML secundum normam SCTA confectis statuit. Nexus
-
2021
phyaml, instrumentum ad YAML lectionum Programming Historian probandum. Nexus
-
2021
phimages, scriptum quod nomina imaginum lectionum Programming Historian mutat. Nexus
-
2020
cleantex, scriptum quod spatia superflua ex documentis LaTeX ex TEI genitis tollit. Nexus
-
2016
LombardPress Schema 1.0.0, accommodatio TEI (ODD) ad transcriptiones criticas et diplomaticas textuum scholasticorum. Nexus Cum regulis transcriptionis critice et diplomatice.
-
2016
pythonxml, scriptum quod differentias inter documenta TEI collationat. Nexus
Instrumenta quibus utor
In machinis meis solo GNU/Linux utor. Nunc libenter distributione Fedora Linux cum mensa KDE Plasma fruor. Per multos annos distributione Manjaro Linux et etiam Arch Linux pura usus sum, sed eas satis instabiles et ad cotidianum usum difficiles inveni.
Ad scribendum et programmandum plerumque GNU Emacs utor, sed sepe ad Neovim, Visual Studio Code, PyCharm et Oxygen XML Editor confugio, prout res postulat.
Hunc situm per Jekyll, generatorem situum staticorum, construxi; forma eius ex themate S.V. Miller orta est. Fontes eius in GitHub patent.